لو بتحلّوا عن الجامعة اللبنانية… لو بتوَقفوا اساءة لسمعة الجامعة الوطنية… دايرين تبخير بالدكاكين يلّي نص شهاداتن مش معترف فيهن… وفاتحين حملات تحريض عالجامعة اللبنانية

لو بتحلّوا عن الجامعة اللبنانية…
لو بتوَقفوا اساءة لسمعة الجامعة الوطنية…
دايرين تبخير بالدكاكين يلّي نص شهاداتن مش معترف فيهن… وفاتحين حملات تحريض عالجامعة اللبنانية…
يا جماعة… حبيتوا أو ما حبيتوا… بحسب الاحصاءات الحديثة: أهم “سمعة مهنية” في لبنان والشرق: لطلاب الجامعة اللبنانية…
حبيتوا او ما حبيتوا… جامعتنا تسجل اعلى المستويات التعليمية بالشرق الاوسط…
و”بَطل” يلّي بينقبل فيها… وبطل يلي بيتخرّج منها… ومغوار يلي بيعيش تفاصيلها…
مع كل الظروف الصعبة وقلة التمويل والبرد والشوب والدرج بلا مصعد… والمعدات المعطلة بأوقات كتيرة… بتبقى هالجامعة زينة الجامعات…

انا تلميذة هالجامعة… وأفتخر… واليوم صرت ضمن الكادر التعليمي فيها…
الفقير متل الغني… ابن السياسي متل ابن الناطور… ما في شي بيشيلك غير الكفاءة…
كنت ضمن الفريق يلي عم يراقب بامتحان الدخول لطلاب الاعلام من اسبوع…
عم نموت نحنا والطلاب من الشوب… بس قلبنا عم يرقص من الفخر… مئات الطلاب عالباب جايين يحققوا اول خطوة بمشوار حياتن واحلامن… بهالجامعة الوطنية…
وبس يبلش العام الدراسي بيكون عندك ٧٠ طالب سنة اولى… من ال ٧٠ عندك ٦٩ عم يتنافسوا عالنجاح بشكل جدي ورصين…
روحوا تسلّوا بفساد الجامعات الخاصة… إدفع تفرح… تسلّوا بمستويات هالجامعات يلي شهاداتن مش معترف فيها… تسلوا بالاراضي يلي عم تبيعوها لتعلموا ولادكن… واتركوا هالجامعة بحالها…
بيكفي اذى…
اتركوا للأهل والطلاب وولاد الأصل خَيار يكون عندن جامعة فيها “رحمة ونعمة”: رحمة أقساط… ونعمة بالتفوق والمستوى الاكاديمي العالي…
بعمرو ما انحرم طالب من امتحان بسبب قسط…
وبالقليل القليل… عم تخرّج هالجامعة أهم طلاب… بكافة الاختصاصات…
تحية لكل طالب “بَطل” بهالجامعة العريقة… تحية لكل دكتور عم يضحّي بهالجامعة ويعطي من قلبو بالرغم من الوضع المادي الصعب… تحية للكادر الاداري والمدراء والعمداء… تحية لرئيس هالجامعة…
“جامعتنا لبنانية” …
ونفتخر!!!!
Lara Sleiman Noun ✍️